22/6 23/6 24/6

ريحوا نفسكم ,لا إتصلت بيها ولا نيلت ,يومها روحت الشغل وانا حاسس إنى رايح أعمل مهمة ,بفكر هتكلم إمتى؟ وهتكلم فى الزحمة ولا لما يبقى المطعم فاضى شوية؟ هقول لعم أشرف الأول ولا هتكلم على طول؟ هتكلم أقول إيه أصلا؟؟
كل ده كان بيدور فى دماغى ,روحت هناك ومبعد ماحددت أنا هعمل إيه بالظبط قررت أرفع السماعة وأتصل , وإذا بالمفاجأة الكبرى ,سمعت صوت رسالة مسجلة بتقول نأسف لعدم إتمام المكالمة لأنكم غير مشتركين بهذه الخدمة ,تخيلوا إن التليفون طلع محلى ,بس إللى هيجننى إنهم يوم ماركبوا التليفون جه حمادة وضرب نمرة موبايل قدام عينى وسمعت رنة التليفون بودانى ,يبقى إزاى بعدها بيومين يبقى محلى؟ ,جايز يكون شال الخدمة ,أو جايز يكون قافل المباشر بطريقة معينة ,دورت فى كل زراير التليفون مالقيتش المفتاح أو الزارا إللى ممكن تقفل منه المباشر ,سيبوكم من كل ده المهم إن التليفون طلع محلى وخلاص ,بس يومها مايأستش ,جاتلى فكرة ملعونة ,أجيب كارت منزلى بتاع فتح المباشر وأتصل من بيتنا أو من الشغل أو من أى حتة ,بصيت فى جيبى لقيت معايا 4 جنيه إلا ربع والكارت كان بخمسة جنيه ,روحت مستلف جنيه من أحمد نبيل الكاشير إللى بيستلم منى وقولتله عشان عاوز أجيب كارت وكده راح الراجل ماكدبش خبر وإدانى الجنيه وإشتريت الكارت
طبعا لما روحت البيت كنت مستنى لما أخويا وأبويا وأمى يقعدوا فى الأوضة التانية عشان أتكلم ف التليفون براحتى ومايبقاش فى حد حواليا وبيراقبنى وأنا بتكلم
إستنيت لما دخلوا يتعشوا وروحت مطلع الكارت ,عاوز أقولكم كنت بتعامل مع الكارت فى الأول زى كده كأنكم جيبتم إنسان بدائى وقعدتوه قدام جهاز كمبيوتر ,خربشت الكارت ودخلت رقم الكارت وبعدين الرقم إللى أنا عاوز أطلبه وطبعا كان رقم ذات الرداء الأحمر ,أول مرة كان خارج نطاق الخدمة بس رن فى المرة التانية ,كنت بكلمها وأنا قاعد قدام الكمبيوتر ,الحمد لله المكالمة كانت طويلة المرة دى وتجنبت كل الكلام الساذج إللى كنت قولته فى المكالمة إللى فاتت ,كلمتها عن ظروف الشغل الشوية وإنى بشتغل فى المكان الفلانى ومواعيدى وكده , وهى كانت بتكلمنى فى حكاية فريق المسرح لأنى سألتها هى بتروح الفريق فى الصيف ولا لأ؟ ,وطبعا قالتلى لأ لأن فى عندها تحفظات كتيرة على الفريق من حيث بعض الناس فى الفريق وإللى من جواهم مش كويسين وأنا بوافقها جدااااااااااا فى رأيها ده ,كلمتنى شوية عن المشكلة إللى حصلت مع أبوها بسبب الفريق والمذاكرة قبل الإمتحانات وكده ,وقالتلى إنها مش بتنزل غير مع مامتها لو كانت رايحة فى حتة أو كده ,بس بكل غباء نسيت أديها نمرة تليفون المطعم ,بس هى أول ما كلمتنى عرفت إنى بتكلم من البيت من غير ما أقولها فأكيد نمرة البيت ظهرت عندها , وهى أكيد طبعا مش هتتصل بيا فى البيت إلا فى حالة واحدة بس وهى إن لو حصلت حرب فى إسكندرية وكل أرقام التليفونات إتمسحت من تليفونها وتليفونات عيلتها كلها ,ويمكن بعد كل ده تفكر شوية برضو قبل ما تكلمنى ,بس عادى انا مبسوط جدا بالمكالمة والمرة دى كان الضرر منها قليل شوية وده لانى بحب أسمع صوتها فى التلفون دايما عشان دايما بترجعنى للإنسان إللى أنا كنت عليه فى الأول قبل ما أتحول للشخص إللى أنا عليه دلوقتى
دلوقتى بحاول أفتكر أى حاجة مهمة حصلت غير خروج إيطاليا من بطولة أوروبا قدام أسبانيا وده لأنى بشجع إيطاليا بشكل بشع ,وكنت بعدى على أحمد سعيد فى البيت وفى الدكان عند أبوه لكن كل مارة ماكنتش بلاقيه ,روحتله تقريبا 3 مرات وهو ماكلفش خاطره يسأل عليا ولو مرة مع إن المفروض هو إللى يسأل عليها لأنه لسا فاضى مش شغال وأنا طالع عين أمى فى الشغل ومش بعرف أنزل وأخرج زى الأول
ع العموم مش مهم إللى عاوزنى يجينى أنا ماباروحش لحد ,دلوقتى حسيت ببعض المساوىء فى الشغل ,زى إنها ساعات بتخلينى أكدب مثلا ,يعنى لو حد جه سألنى وقاللى عندك فكة يا عمو والنبى؟ بقوله لا والله يا حبيبى مافيش وأنا بيبقى معايا بس لازم أقوله كده لأنى هحتاجها ,بس ده مش برر لأنى بحلف كدب لأنىىبقوله مش عندى وانا عندى
فى حاجات تانية أهم من كده زى مثلا إنها مانعانى عن الصلاة وده لأنه بيعدى عليا فى الشغل صلا ة الظهر والعصر والمغرب وللأسف ماينفعش أسيب مكانى وأقوم وإلا ممكن تحصل كارثة لأن محدش هناك بيفهم فى المكنة هناك غيرى ,ده غير إنها ممكن تتسرق وأنا مش موجود وأروح فى داهية ,شوفتوا السئولية كبيرة إزاى؟
ده طبعا غير التحول إللى عمال يحصل فيا وفى شخصيتى وده بدون موافقة منى
كل دى مساوىء بس أنا لازم أشوف ليها حل وأكمل ,دلوقتى المفروض إنى بكرة هشتغل الصبح وبليل وده لان صاحبى أحمد عنده فرح فى الإسماعيلية ولازم يروحه وطلب منى إنى أكمل مكانه بليل ,يعنى هشتغل بتاع حوالى 15 ساعة وده لأنى هروح متأخر الصبح عشان يبقى فيا دماغ وأقدر أكمل بليل
ودلوقتى هسيبكم بس ماتخافوش من غير ما أكتب أشعار ولا خواطر ولا نيلة




إمضاء/ العايش فى قبره




الشخصيات إللى قابلتها



عمال المطعم
مصطفى سليمان
أحمد قطب
محمد مجدى
أحمد عوض
أختى وخالد وتسبيح
على
كريم عرفة و محمود عبد العال من فريق المسرح
أميرة ع النت
ذات الرداء الأحمر فى التليفون
ويمكن يكون فى ناس تانية